Pedaran B.Sunda Ngalamar

A.    MACA PEDARAN

Baca ieu pedaran di handap kalawan bedas sarta titenan tanda bacana deuih!

ADAT ISTIADAT DINA NGALAMAR

            Prah di mana-mana, atawa biasa kapanggih. Kaasup di luar nagri. Samèmèh lalaki jeung awèwè resmi dikawinkeun, sok dimimitian heula ku acara ngalamar. Ngan carana anu teu sarua atawa bèda-bèda tèh. Cara ngalamar urang Amèrika, pasti bèda jeung urang Indonèsia. Nya kitu deui antara urang Jawa Tengah atawa jawa Timur jeung urang Sunda.

            Urang Sunda ogè gumantung kana waktu jeung tempatna. Cara ngalamar jaman baheula jeung ayeuna, pasti henteu sarua. Nya kitu deui cara ngalamar urang Cianjur jeung urang Banten, èta ogè moal sarua deuih.

            Ngalamar jaman ayeuna leuwih gampang jeung sederhana. Bèda jeung jaman baheula, loba pisan cara jeung aturanana.

            Jaman baheula mah antara si lalaki nu rèk ngalamar, jeung si awèwè nu rèk dilamar tèh, tacan tangtu wawuh. Ari ayeuna mah apan, umumna lain baè geus wawuh, tapi geus jadi bèbènè (kabogoh). Jadi nu disebut ngalamar tèh, ukur formalitas atawa nanya resmi, siap henteuna si awèwè diajak kawin.

            Atuh jawabanana ogè, moal aya basa nolak. Langsung satuju, malah sakalian nangtukeun waktuna. Ari sababna lian ti geus pada wawuh, biasana sarua bogohna.

            Tah, ngalamar jaman baheula mah can tangtu kitu. Teu unggal ngalamar pasti ditarima. Bisa waè si awèwèna nolak, boh lantaran teu bogoh, boh lantaran geus kapiheulaan ku nu sèjen. Ngan dina nolakna tara togmol nyebut embung. Upamana langsung ngajawab, “punten pun anakna henteu bogoheun” Atawa, “Punten parantos aya nu gaduh”

            Tapi ngusahakeun sangkan dina nolakna, henteu matak nyerieun hatè pihak anu ditolak. Contona, “Nya èta pun anak tèh, teu acan aya niat rarabi. Ma’lum masih kènèh bau jaringao.” Padahal nempo ukurna, geus meujeuhna dikawinkeun. Ngan ku sabab awèwèna teu bogoh atawa kolotna teu satuju, lamaranana kapaksa ditolak.

            Lamun hayang leuwih jèntè awèwèna teu bogoheun, carana nolak bisa ku cara mapandèkeun kana manuk. Biasana manuk titiran. “ Nya èta gaduh manuk tèh titiran emas, sakurungna kedah sareng titiran emas deui.” Maksudna anak kuring tèh teu bogoheun. Bisa jadi lantaran anu ngalamarna kurang kasèp.

            Baeula mah sual jodo tek kacida apikna. Mèmèh ngalamar jeung narima lamaran, kudu puguh heula, anak saha, beunghar atawa henteu. Boga pangkat atawa ukur jelema biasa. Tegesna, ditaliti heula kaayaan kulawargana, bisi henteu sarua atawa henteu saimbang.

            Ari sababna harita mah, anak mènak kudu jeung anak mènak deui. Nu beunghar kudu jeung nu beunghar deui. Utamana lamun tacan wawuh.

            Di Cianjur baheula, aya kabiasaan kieu: titahan si lalaki, naghaja nyèmah ka kulawarga awèwè. Sanggeus disuguhan, si pribumi sok buru-buru nanya:

“ geuning aya pikersaeun naon, asa rareuwas teuing?” cèk pribumi.

“Nya èta gaduh manuk, mung teu acan gaduh kurungna,”

“kagungan manuk naon kitu?”

“Titiran emas”

“Euleuh atuh kurungna gè kedah kurung saè. Kaleresan gaduh hiji, hèg terus acan aya manukan.”

            Tina obrolan di luhur, kanyahoan wèh, boh lalakina, boh awèwèn, sarua turunan mènak. Bèda deui upama si sèmah nyebutkeun manuk piit atawa ukur cangkurileung. Nya kitu deui upama pribumi ukur nyebutkeun, aya ogè kurung  biasa, hartina turunan jelema bisa.

            Cara sèjènna dina nyuguhan. Upama pribumi hayang nèmbongkeun, yèn manèhna kulawarga mènak, wadah susuguhna sok ngagunakeun bahan poslèn. Utamana pisin jeung cangkirna. Engkè samèmèh ki Sèmah ngasaan susuguh pribumi, sok nanya kieu:

“Euleuh ieu cacangkir aya ku saè, moal lepat deui bahanna tina poslèn,”maksudna nanyakeun naha enya pribumi tèh kulawarga mènak?

“Leres poslèn asli wedalan Cina,” maksadna, bener malah mènak bolongkotan. Lain ngan ukur tuturunan, atawa boga gelar radèn pamèrè, pèdah aki-buyutna kungsi digawè di karaton.

            Dijawab deui ku ki semah, “Kaleresan, di rormpok ogè gaduh, heug mani sami pisan,” maksudna, sarua manèhna ogè kulawarga mènak asli.

            Anu dicaritakeun di luhur, kakara ngalamar tahapan kahiji. Upama kira-kira sarua satuju, isuk pagèto bakal datang deui, resmi ngalamar. Tahapan nepi ka dinya disebutna neundeun omong. Duanana kakara satuju. Tapi, boh pihak awèwè, boh pihak lalaki, acan katalian ku jangji nanaon. Ku kituna meunang masing rèk ngabatalkeun ogè.

            Naon sababna disebut neundeun omong? Sabab pihak lalaki tacan mèrè nanaon. Mun barangbeuli tèa mah, acan mèrè tanda pangjadi.

                                                                                    (Dicutat tina buku ajar Pamager Basa)

B.     NGALAMAR

Sanggeus pihak lalaki jeung pihak awèwè satuju, tina neundeun omong naèk kana tahapan kadua, resmi ngalamar. Dina ngalamar resmi mah, wakil pihak lalaki tèh datangna henteu nyorangan. Tapi dibarengan ku rombongan, biasana lalaki jeung awèwè, sarta henteu lèngoh..

            Kabèh babawaan anu ngkèna bakal dipasrahkeun ka pihak awèwè minangka  tanda jadi, disebutna panyangcang. Loba seutikna babawaan, nandakeun harkat anu ngalamar jeung nu dilamar.

Prak-prakna Ngalamar Jaman Baheula Nu Kacatet dina Novel BKN

            Barang kira-kira pukul 8, leugeudeut aya anu ngaleut; pangheulana mawa lampu, dtèma ku Ibu Haji Banisah,beunang ku dikukudung ku sal, sepuh kamashur purah dipiwarang  ngalamar, tina percèka, tatag jeung bèrès ana nyarita. Pandeurina Ibu Haji, ngaleut awèwè garinding, siga nu rèk ngadukeun kageulisan. Tingkaloprak sora selopna, tingkedepruk sora sampingna, meleber seungit minyakna. Sawarèh aya nu nanggung baki, dituruban ku rènda jeung mendepun. Sapandeurieun awèwè, ngabrul lalaki, aya kana sapuluh urangna.

            Eta abrulan kabèh asup ka bumina Tuan Haji Abdul Raup. Nu kagungan bumi, istri pameget, mapageun ka panto, tuluy tatamu dicalikkeun, ngabèrès istri padaistri, pameget padapameget. Baki-baki diasorkeun ka payuneun Tuan Haji jeung Nyi Haji.

            Sanggeus reureuh palay, pok Ibu Haji Banisa sasauran, “Tuan Haji kuring tèh pang dongkap ka dieu, dijurung ku tuang raka, Tuan aji Samsudin, ngahaturkeun ieu kagegelan, tawis ngiring bingah rèhing bade nepangkeun tuang putra tèa, Ujang Kusèn ka Nyi Rapiah. Ieu nu sabaki RP 250,-keur mayar maskawina, ari ieu nu sabaki Rp 150,- ngiring hajat. Jabi ti èta ieu opat baki panganggo keur putra, Nyi Rapiah. Sareng aya ogè sipat emas inten sagedè beunyeur tamba pamali, èstu lumayan pisan”

            Walon Haji Abdul Raup, “Beu, atuh èta mah lumayan!Ari satadina maksud kuring motong popoharaan kitu, da lain jeung deungeun-deungeun, urang sederhana baè. Ceuk kolot mah entong ngadukeun kabeungharan. Ari kang Haji bet ngajak saenyana.”

            Cèk Haji Banisah, “Ih sanes kitu èta maha awahing ku beak karep nya kadoa baè, nawiskeun suka ati”

            Cèk Nyi Haji Abdul Raup, “Nuhun aceuk, nujun Kang Haji aya manah asih ka pun anak; mugi-mugi waè masing lulus munglus, kolot-kolot masing ngeuna nènjo, ngeunah ngadèngè.”

            “Walon Haji Banisah, “Sumuhun, Nyai Haji ku Aceuk dido’akeun masing runtut-raut, hèjo-lèmbok, panjang carita, jauh balai parek-rezeki, reuay putra. Iraha mangsana anu bade dipimanah tèh?

            Dijawab ku Haji Abdul Raup, “Manawi karempagan urang tanggal 17 baè sasih payun, margi saperkawis kuring tacan sayagi, kadua ngeunahna di dinya, kènging tataros ka Kiai Bojong.”

            Cèk Haji Banisah, “Yaktos raos di dinya tèh. Mangga urang carioskeun ka tuang raka; èmutan kuring moal datang ka teu cocog.”

            Ti dinya der ngaraleut. Sanggeus bèrès, tatamu amitan mulang. Acara ngalamar rèngsè, tinggal nungguan waktuna dikawinkeun. 

C.    RUPA-RUPA ADAT ISTIADAT SUNDA

Adat istiadat tèh nya èta tata-cara atawa kabiasaan sapopoè hiji masarakat. Upama urang Sunda, kabiasaan sapopoè masarakat Sunda. Keur nambah-nambah kanyao hidep, ieu di handap aya sababaraha rupa adat-istiadat Sunda jaman baheula:

1.      Babarit

Nya èta hajat nyalametkeun (salametan) lebur. Carana, salembur nyangu kawas rèk lebaran. Diantarana nyieun tumpeng jeung rupa-rupa bubur ketan. Dipingpin ku kokolot lembur, ngariung di hiji tempat, atawa ngajajar sisi jalan dèa. Sanggeus kokolot lembur ngeungeut menyan, terus mènta-mènta ka karuhun, supaya lembur reujeung pangeusina dijaga tina rupa-rupa misibat. Cara saterusna daar balakecrakan

2.      Ngaliwon Orok

Waktuna unggal jumaah kaliwon. Orok umur bubulnan atawa mimingguan tèh, isuk-isuk dibawa ku paraji atawa dukun. Tuluy dimandian cai kembang tujuh rupa. Biasana sakalian dicekok, diinuman peresan konèng meunang marud. Berès dimandian tuluy dijampean. Maksudna, supaya ulah babari katerap panyakit.

3.      Tujuh Bulanan

Nya èta salametan nu kakandungan tujuh bulan. Biasana nu keur kakandungan dimandian cai tujuh rupa. Lian ti eta sok nyieun rurujakan, rujak bebek. Rujakna tuluy dijual, ari duit jang pameulina ku talawèngkar (sesemplèkan kentèng atawa gagarabah). Engkèna duduitan lading rujak ku nu kakandungan dipiceun ka parapatan jalan. Cenah, lamun rujakna lada, anakna pasti lalaki. Upama semu amis, awewè.

Lian ngarujak bebek, bapana orok nu dikandung ngagambaran dawegan kalapa konèng, make peso mèncos atawa paku. Biasana gambar wayang Arjuna atawa Subadra. Kudu dawegan konèng, supaya kulit anakna engke koneng.

Dawegan dibeulah dua ku bapana orok nu dikandung. Upama beulahna sarua, pasti anakna kasèp atawa geulis. Munlalaki kembaran Arjuna, upama awèwè kembaran subadra.

4.      Meuncit Sato Bèla

Naon baè satona mah, rèk hayam jago, domba jalu, atawa munding jalu. Tapi, biasana mah mun lain hayam, paling domba atawa embè. Sato nu dipakè, dipeuncit bareng jeung nyunatan budak. Budak sempring disunatan, sato nu dipakè bèla gèrèsèl dipeuncit. Tujuana sangkan budak nu disunatan henteu ngarasa nyeri. Cenah, lantaran rasa nyerina dipindahkeun ka sato nu dipakè bèla tèa.

5.      Hajat laut

Urang basisir kidul, umumna percaya, yèl laut tèh aya nu ngarajaan, nya èta Nyi Roro Kidul. Ku kituna hasil-henteuna maranèhna ngala lauk, kumaha ceuk Nyi Roro Kidul. Supaya Nyi Ratu bageur, saban taun, unggal tempat waktuna bèda-bèda, biasana mangsana gegedèna ombak, sok diayakeun hajat laut.

Anu dihajatkeunana, lian ti tumpeng salengkepna, sok ditambahan ku hulu munding. Cara nyanggakeunana ka Nyi Ratu, ku jalan dipalidkeun ka tengah laut. Bareng jeung hajat laut, sok aya raramèan, biasana sok nanggap wayang atawa ronggèng.

6.      Ngaruat

Tujuanana sarua jeung babarit, mènta kasalametan ka karuhun jeung nu ngageugeuh lembur, dayeuh, atawa nagara. Bèdana tèh nu diruatna bisa lembur, nagara, bisa wangunan anyar, imah, kantor, pabrik, bisa ogè jelema (budak). Upama budak, budak lalaki kapiheuleutan (panengah). Lanceuk jeung adina awèwè.

Diruat ku cara nanggap wayang, disebutna ngawayang ngaruat. Biasana ngondang dalang kolot ahlina. Lalakonna teu meunang nu sèjèn kudu lalakon “Batara Kala”. Salila pagelaran wayang can tamat, nu lalajo teu meunang balik. Sing saha nu wani balik, bakal jadi mangsa Batara Kala. Batara Kala tèh hiji buta (raksasa), kabeukina daging jeung getih jelema.